PS përmbyll fazën e dytë të përzgjedhjes së kandidatëve të rinj për zgjedhjet parlamentare

Partia Socialiste përmbylli të premten fazën e dytë të përzgjedhjes së kandidatëve të rinj për deputetë në zgjedhjet parlamentare të 25 prillit.

Sekretari i Përgjithshëm i PS-së, Taulant Balla tha se nga 1,600 aplikues në platformën “Deputeti që duam”, tashmë janë përzgjedhur 58 të rinj, të cilët në fazën e tretë të përzgjedhjes do t’i bashkohen grupeve zgjedhore të socialistëve në 12 qarqet e vendit për zgjedhjet e ardhshme.

“Me pjesën tjetër që nuk u përzgjodh ne do të vazhdojmë t’i ruajmë bashkëpunimet,” – tha Balla duke mos përmendur emra konkretë të të rinjve, apo numrin e përgjithshëm të të rinjve që do të kandidohen më 25 prill nga kryesia e PS-së.

Fushata e nisur nga socialistët, e quajtur si “Deputeti që duam” dhe e mbështetur nga disa fondacione të huaja sikurse Friedrich Ebert, parashikonte identifikimin e sa më shumë të rinjve në komunitete të ndryshme për angazhim në politikë dhe një tërësi trajnimesh në akademinë politike të ngritur nga socialistët.

Gjatë komunikimit online i pranishëm ishte edhe ish-raportuesi për Shqipërinë në Parlamentin Europian, Knut Fleckenstein, i cili u angazhua nga socialistët në akademinë politike.

Fleckenstein përgëzoi nismën e ndërmarrë dhe interesin e të rinjve për t’u angazhuar politikisht, për këtë ai uroi dhe suksese.

I konsideruar si proces ripërtëritje nga kryetari i PS-së Edi Rama, fushata “Deputeti që duam” synon të sjellë figura të reja në radhët e socialistëve.

Ndryshe nga PS, partia më e madhe e opozitës, Partia Demokratike, zgjodhi t’ia delegojë përzgjedhjen e kandidatëve një Komisioni Vlerësimi pranë kryesisë e më pas votimit nga anëtarësia.

Zgjedhjet parlamentare të 25 prillit parashikojnë kandidimin me lista pjesërisht të hapura ku një pjesë e kandidatëve do të mandatohen si deputetë nga votat direkte që mund të marrin si individë dhe jo prej votave të përgjithshme të partive.

Lexoni gjithashtu:

Pas 1600 aplikimeve, PS nis fazën e dytë të përzgjedhjes së kandidatëve për deputetë