PS pritet të votojë kundër ngritjes së Komisionit Hetimor për çështjen “Becchetti”

Në seancën plenare të së enjtes PS do të votojë kundër ngritjes së Komisionit Hetimor për çështjen “Becchetti”, mëson Euronews Albania.

Në një deklaratë për mediat pas mbledhjes, kreu i grupit parlamentar socialist, Taulant Balla tha se  kërkesa për komision hetimor për çështjen “Becchetti” është në kundërshtim me Kushtetutën. Ai u shpreh se hetimi i kësaj çështjeje, në këtë fazë dëmton interesat e Shqipërisë.

Burime nga mbledhja e Grupit Parlamentar të Partisë Socialiste bëjnë me dije se për ngritjen e komisionit hetimor për “Inceneratorët” dhe “Zgjedhjet e 25 prillit” do të votohet pro, por do të kërkohet të riformulohet objekti i hetimit.

Një javë më parë, Konferenca e Kryetarëve vendosi që të shtyhet ngritja e 3 komisioneve hetimore parlamentare të kërkuara nga PD.

Kreu i grupit Parlamentar të Partisë Socialiste, Taulant Balla deklaroi se është me rëndësi gjetja e konsensusi ndërmjet palëve lidhur me objektin e hetimit dhe sipas tij më pas mund të arrihet një vendimmarrje.

Opozita kërkon ngritjen e 3 komisioneve hetimore, pasi në to sipas demokratëve ka akte korruptive dhe veprime anti-kushtetuese.

Emrat e propozuar nga Partia Demokratike si anëtarë të Komisionit Hetimor për zgjedhjet e 25 prilli janë: Enkelejd Alibeaj, Gazment Bardhi, Oerd Bylykbashi, Ferdinand Xhaferri, Sorina Koti, Ervin Salianji dhe Kreshnik Çollaku.

LEXONI GJITHASHTU:

• Konferenca e Kryetarëve shtyn ngritjen e 3 komisioneve hetimore të kërkuara nga PD
• Emrat e anëtarëve që propozon PD për në Komisionin Hetimor për 25 prillin
• ‘Keni gënjyer me shifrat’, Basha debaton me Manastirliun për vdekjet gjatë pandemisë