Pse dështoi plani për votën e emigrantëve? Të rinjtë kërkojnë arsyet nga PD dhe PS

Të rinjtë kanë drejtuar pyetje në rrjetet sociale të Euronews Albania, për kandidatët e PS dhe PD duke u kërkuar atyre shpjegime se pse vota e emigrantëve nuk u arrit të përfshihej në këto zgjedhje.

Kandidati i selisë rozë, Arben Pëllumbi  tha se ky proces nuk u arrit për shkak se opozita nuk ishte bashkëpunuese.

Sipas tij, në zgjedhjet e ardhshme kjo gjë do të realizohet pasi tashmë është gati kuadri ligjor.

“PS e ka pasur një nga premtimet e saj realizimin e votës së emigrantëve dhe kë luftuar shumë, luftoi shumë edhe për marrëveshjen që bëmë jashtë parlamentit me PD me 5 qershor dhe është arritur të futet në Kod. Sot është i gjithë kuadri ligjor për të garantuar votën e emigrantëve. Nuk pati kohë dhe bashkëpunim nga krahu tjetër, sepse duhet të dilnin akte nënligjore. Nuk bëhett vetëm, por duhet të jenë të dyja palët dakord. Besoj se në zgjedhjet e radhës votimi i emigrantëve do jetë realitet”, tha Pëllumbi.

Ndërkaq, për Partinë Demokratike fajtori për mospërmushjen e kësaj të drejte për emigrantët duhet kërkuar tek qeveria shqiptare dhe jo tek opozita.

“Mungoi vullneti i mazhorancës. Në vitin 2013, PS u zotua për votën e emigrantëve. Në 2017 u bë dhe një ministri. Kush është përgjegjësia? Është e qeverisë. Qeveria nuk bëri kushtet bazë për të bërë regjistrin. Nuk dolën aktet nënligjore, aktet nuk nxirren nga parlamenti, por nga Këshilli i Ministrave. Fakti që nuk është realizuar hidhni sytë nga qeveria, e cila e ka pasur në dorë për të pasur regjistrin e emigrantëve”, tha ai.