Publikimi i të dhënave, SPAK merr në pyetje gazetarët Bushati dhe Shkullaku

Publikimi në media i të dhënave personale të zgjedhësve të qarkut të Tiranës ka shkaktuar debat dhe akuza të ndërsjella mes qeverisë dhe Partisë Demokratike.

PD-ja ka hedhur akuza ndaj selisë rozë se ka marrë të dhënat nga portalit qeveritar e-Albania dhe i ka përdorur për qëllime zgjedhore.

Gazetarët Andi Bushati dhe Armand Shkullaku, të cilët janë administratorë të medias ku u publikuan të dhënat janë marrë në pyetje nga Struktura e Posaçme Kundër Korrupsionit dhe Krimit të Organizuar (SPAK).

Z. Bushati tha se prokurorët ishin të interesuar të dinin burimin e informacionit.

“Prokuroret ishin të interesuar se kush ishte burimi i nxjerrjes së informacionit. SPAK kërkoi të dorëzojmë sistemin e listave, por nuk pranuam”, shtoi ai.

Menjëherë pas publikimit të të dhënave, drejtuesi i SPAK, Arben Kraja tha se do ta regjistrojë çështjen dhe shumë shpejt do të ketë detaje konkrete.

Agjencia Kombëtare e Shoqërisë së Informacionit pak ditë më parë iu përgjigj interesit të Euronews Albania, ku theksoi se të dhënat nuk janë përdorur për qëllime elektorale.

“Sulmet e Partisë Demokratike ndaj platformës E-Albania, e cila siguron shërbimet publike online për qytetarët janë të pabaza. Ne e kuptojmë se PD është në fushatë por kjo nuk justifikon sulmin politik ndaj një institucioni që është kryekëput në shërbim të qytetarëve. Agjencia Kombëtare e Shoqërisë së Informacionit garanton qytetarët shqiptarë se në asnjë rrethanë të dhënat e disponuara nga AKSH-i as nuk janë përdorur, po as nuk mund të përdoren teknikisht nga partitë politike ose vetë qeveria për qëllime politike apo elektorale”, thekson AKSHI.

Lexoni gjithashtu:

Përdorimi i të dhënave, PD përgatit padi në SPAK ndaj E-Albania, AKSHI: Akuza të pabaza