Puçi i shtetit në Niger, Afrika Perëndimore përgatitet për ndërhyrje ushtarake

Kombet e Afrikës Perëndimore janë duke u përgatitur të premten për një intervenim të mundshëm ushtarak në Niger, pas puçit ushtarak të disa javëve më parë.

Megjithatë, shtetet fqinje kanë thënë se ende nuk kanë hequr dorë nga zgjidhja e krizës në mënyrë paqësore.

Ushtria e Nigerit e ka rrëzuar ish-presidentin e shtetit, Mohamed Bazoum më 26 korrik, duke e regjistruar puçin e shtatë në perëndim dhe qendër të Afrikës në tre vjetët e fundit.

Ky veprim e ka rritur edhe më shumë jostabilitetin në këtë rajon të varfër, që veçse përballet me kryengritje të islamistëve.

Blloku rajonal, ECOWAS ka urdhëruar të enjten aktivizimin e një force për angazhim të mundshëm kundër ushtrisë së Nigerit.

Ende nuk dihet sa e madhe është forca që tani është në gatishmëri dhe cilat shtete do të kontribuojnë në forcim të saj.

Pas një samiti të mbajtur mes krerëve të shteteve të rajonit, në kryeqytetin e Nigerisë, Abuxha, blloku është zotuar për vënie të sanksioneve, për vendosje të ndalesave në udhëtim, ngrirje të aseteve të ushtrisë së Nigerit, dhe aktivizimin e një force rajonale.

Franca, e cila dikur e ka pasur Nigerin koloni, ka thënë se i përkrah të gjitha përfundimet që kanë dalë pas takimit të ECOWAS-it.

Mirëpo, ajo nuk ka treguar nëse do të ofrojë mbështetje konkrete në rast të ndonjë intervenimi.

LEXONI GJITHASHTU:

• Kulla te Pallati i Kulturës, Rama: Marrëveshje private mes pronarëve e investitorëve
• Grushtoi për vdekje 55-vjeçarin në Vlorë, Rei Meta del para gjykatës