Punimet rehabilituese, dalin oraret e reja të bllokimit të autostradës Tiranë-Durrës

Autoriteti Rrugor Shqiptar (ARRSH), në bashkëpunim me Policinë e Shtetit, ka vendosur ndryshime në planin e menaxhimit të trafikut në autostradën Tiranë-Durrës, për të mundësuar punimet rehabilituese në segmentin nga Vora deri te ura e Dajlanit.

Sipas njoftimit të Ministrisë së Infrastrukturës dhe Energjisë, për shkak të trafikut të rënduar nga ndërhyrjet për riparimin e shtresave asfaltike në segmentin Vorë–Ura e Dajlanit, është hartuar një plan i ri për lehtësimin e qarkullimit dhe garantimin e sigurisë rrugore gjatë punimeve.

Duke filluar nga nata e 14 tetorit, nga ora 23:00 deri në 06:00 të mëngjesit do të zbatohet bllokimi i përkohshëm i qarkullimit në drejtimin Vorë–Durrës në këto segmente:

Vorë – Maminas

Maminas – Sukth

Sukth – Fllakë

Fllakë – Mbikalimi i Shkozetit

Mbikalimi i Shkozetit – Ura e Dajlanit

Kohëzgjatja e punimeve në çdo segment parashikohet të jetë 1-2 ditë, në varësi të kushteve atmosferike dhe progresit të punës.

Gjatë bllokimit të qarkullimit, përdoruesit do të duhet të ndjekin rrugën alternative:
Vorë – Maminas – Katër Rrugët e Shijakut – Durrës.

Pas përfundimit të punimeve në drejtimin Vorë–Durrës, do të vazhdojnë ndërhyrjet në drejtimin tjetër, nga Ura e Dajlanit në Vorë, me të njëjtin plan dhe afat kohor.

ARRSH thekson se këto ndërhyrje janë të domosdoshme për rehabilitimin e infrastrukturës dhe përmirësimin e cilësisë së shërbimit për përdoruesit e rrugës. Institucioni kërkon mirëkuptimin dhe bashkëpunimin e qytetarëve, duke i ftuar të përdorin rrugët alternative gjatë orareve të punimeve.

LEXONI GJITHASHTU:

• Punimet në autostradën Tiranë–Durrës, policia: Po punojmë për të menaxhuar trafikun
• Riparimet në segmentin Vorë-Ura e Dajlanit, ARRSH njofton rrugët që do të bllokohen