Gjykata e Lartë e Spanjës ka shpallur fajtor për sulm seksual, ish-presidentin e Federatës së Futbollit, Luis Rubiales.

Rubiales u dënua për incidentin e ndodhur gjatë ceremonisë së ndarjes së medaljeve në Kupën e Botës 2023, ku puthi pa dëshirën e saj futbollisten spanjolle Jenni Hermoso.

Ai u dënua me një gjobë prej 10,800 eurosh dhe i është ndaluar kontakti me Hermoso për një vit.

Gjithashtu ish-shefi i federatës Spanjolle do të duhet të mbaj një distancë prej 200 metrash nga futbollistja.

Megjithatë, ai u shpall i pafajshëm për akuzën e detyrimit, e cila lidhej me përpjekjet e dyshuara për të bindur Hermoso që të deklaronte publikisht se puthja kishte qenë konsensuale.

Gjatë ceremonisë së ndarjes së medaljeve pas fitores ndaj Anglisë në finalen e Kupës së Botës në Sydney, Rubiales e kapi Hermoso nga koka dhe e puthi në buzë. Kjo ngjarje shkaktoi një valë protestash dhe kërkesash për dorëheqjen e tij.

Në gjyq, Rubiales mbrojti veprimet e tij duke e cilësuar puthjen si një “akt dashurie” dhe “diçka krejtësisht spontane”. Ndërkohë, Hermoso dëshmoi se nuk kishte dhënë pëlqimin e saj dhe se incidenti kishte “njollosur ditën më të bukur në karrierën e saj”.

Tre ish-zyrtarë të tjerë të Federatës Spanjolle të Futbollit, të akuzuar për bashkëpunim në përpjekjet për të detyruar Hermoso të ndryshonte versionin e saj të ngjarjes – trajneri Jorge Vilda, ish-kreu i marketingut Rubén Rivera dhe ish-drejtori sportiv Albert Luque – u shpallën të pafajshëm.

Prokurorët kishin kërkuar një dënim me burg për Rubiales, por gjykata vendosi dënimin me gjobë.

LEXONI GJITHASHTU:

• FIFA konfirmon pezullimin e Rubiales nga Futbolli për shkak të puthjes në Botëror
• Zbulohet jeta e dyfishtë e futbollistit, përveç gruas fëmijë dhe me modelen e njohur