FIFA konfirmon pezullimin e Rubiales nga Futbolli për shkak të puthjes në Botëror

Organi qeverisës i futbollit botëror, FIFA, e ka konfirmuar të premten pezullimin trevjeçar nga futbolli të ish-presidentit të Federatës së Futbollit të Spanjës, Luis Rubiales, pasi e hodhi poshtë ankesën e tij.

Rubiales u pezullua për tri vjet nga të gjitha aktivitet e futbollit më 30 tetor, sepse e puthi në buzë futbollisten Jenni Hermoso pa pëlqimin e saj, pas fitores së Spanjës kundër Anglisë në finale të Kupës së Botës së grave në gusht të vitit të kaluar.

FIFA tha se e mori këtë vendim pas një seance dëgjimore. Megjithatë, ndaj këtij vendimi 46-vjeçari mund të ankohet sërish, tani në Gjykatën e Arbitrazhit Sportiv, shkruan REL.

“Komiteti i Apelit ishte i bindur se Rubiales u soll në kundërshtim me parimet e Kodit Disiplinor të FIFA-s, neni 13, gjatë dhe pas finales së Kupës së Botës së grave”, tha FIFA.

Rubiales dha dorëheqje si kryetar i federatës spanjolle të shtator, duke thënë se nuk mund ta mbronte më pozitën pas kritikave të mëdha. 46-vjeçari ishte zotuar fillimisht se nuk do të jepte dorëheqje, pavarësisht trysnisë nga futbollistët, politikanët dhe grupet për të drejtat e grave.

Futbollistja Jennifer Hermoso duke festuar me presidentin e Federatës së Futbollit të Spanjës, Luis Rubiales, pas fitimit të Kupës së Botës, 20 korrik 2023.

Gjykata e Lartë e Spanjës propozoi të enjten që Rubiales të dalë para gjyqit për atë puthje, duke thënë se hetimi ka gjetur se puthja “nuk u bë me bashkëpajtim dhe ishte një veprim i njëanshëm dhe befasues”.

Gjykata kërkoi që para saj të dalin edhe ish-trajneri i kombëtares së grave, Jorde Vilda, si dhe Albert Luque, drejtori sportiv i kombëtares së burrave, dhe Ruben Ribera, shefi i marketingut në federatë, për dyshimet se i kishin bërë trysni Hermosos të thoshte se puthja ndodhi me pajtimin e saj.

LEXONI GJITHASHTU:

• “Ngjan me atë serb”- Egbo: Për 5-10 vite Futbolli i Kosovës ia kalon Shqipërisë
• Zbulohet jeta e dyfishtë e futbollistit, përveç gruas fëmijë dhe me modelen e njohur