Putin dëshiron të vrasë të gjithë kombin tonë, thotë zyrtari ukrainas

Kryebashkiaku i Melitopolit, Ivan Fedorov deklaroi se presidenti i Rusisë, Vladimir Putin dëshiron të vrasë kombin ukrainas.

Fedorov, i cili u arrestua nga forcat ruse për pesë ditë në mars, tha se qyteti i tij është në një situatë shumë të vështirë dhe të rrezikshme, shkruan CNN. Fedorov u lirua si pjesë e një marrëveshjeje për shkëmbimin e të burgosurve.

Kryebashkiaku shtoi se qytetarët e Melitopolit nuk janë në gjendje të marrin ndihma.

“Ne nuk mund të dërgojmë ndihma humanitare.  Kjo është arsyeja pse është një situatë shumë e rrezikshme”, u shpreh ai.

Forcat ruse pushtuan Melitopolin, në Ukrainën juglindore, brenda disa ditësh nga fillimi i pushtimit.

Fedorov foli në Parlamentin Europian në Bruksel të mërkurën, ku u bëri thirrje ligjvënësve europianë të ndihmojnë Ukrainën me të gjitha mjetet e mundshme.

LEXONI GJITHASHTU

• Mbi 2,9 milionë refugjatë ukrainas janë larguar drejt Polonisë
• Zyrtarë të OSBE-së arrestohen në Ukrainë