Putin dhe Erdogan do takohen javën e ardhshme në Soçi

Presidenti i Rusisë, Vladimri Putin, do të mirëpresë homologun e tij turk, Recep Tayyip Erdogan, në Soçi më 4 shtator.

Takimi Putin-Erdogan vjen gjashtë javë pasi Moska u tërhoq nga marrëveshja për eksportin e drithërave ukrainase që Ankaraja dhe Kombet e Bashkuara e kishin ndërmjetësuar.

Zëdhënësi i Kremlinit, Dmitry Peskov, njoftoi se dy liderët do të takohen, teksa pritet që ata të diskutojnë për marrëveshjen e drithërave, apo siç njihet edhe si nisma e drithërave e Detit të Zi.

Kjo marrëveshje kishte mundësuar që të transportoheshin drithërat nga portet ukrainase në Detin e Zi për në Afrikë, Lindje të Mesme dhe Azi.

Marrëveshja ishte arritur në korrik të vitit 2022 dhe mundësonte kalimin e sigurt të produkteve ushqimore ukrainase.

Po të njëjtën kohë u arrit edhe një memorandum midis OKB-së dhe Rusisë, përmes së cilit palët u zotuan se do të tejkalonin pengesat me të cilat përballen dërgesat ushqimore ruse dhe plehrat artificiale.

Megjithatë, Rusia u tërhoq nga marrëveshje duke argumentuar se kërkesat e saj nuk ishin plotësuar.

Sekretari i Përgjithshëm i OKB-së, Antonio Guterres, tha se i ka dërguar Rusisë një propozim të ri me synim të ringjalljes së marrëveshjes, por ministri i Jashtëm rus, Sergei Lavrov, tha se ky propozim nuk përmbush kërkesat ruse.

LEXONI GJITHASHTU:

• 56-vjeçari humbi jetën pas një shpërthimi në banesë, policia zbardh ngjarjen
• Konferenca e kryetarëve/ Bardhi: Kërkesa e PD u refuzua nga mazhoranca