Putin flet pas takimit me Vuçiç, zbulon çfarë i tha presidenti serb

Presidenti rus Vladimir Putin ka dhënë një konferencë për shtyp pas takimit me homologun serb, Aleksandër Vuçiç.

Ai tregoi se pati një takim të shkurtër me presidentin Vuçiç dhe tha se ky i fundit ishte i shqetësuar për situatën në rajon, shqetësim, që siç tha Putin e kanë dhe ata.

Putin foli dhe për takimin me kryeministrin hungarez, Viktor Orban.

“Kur më pyeti për mundësinë e një zgjidhjeje paqësore, unë thashë atë që e kam thënë shumë herë më parë, se nëse pala ukrainase dëshiron vërtet të negociojë, nuk duhet të bëjë gjeste teatrale, por të fillojë duke anuluar urdhrin ekzekutiv presidencial që ndalon bisedimet me Rusinë.

Thuhet se ata janë gati për negociata tani. Disa zyrtarë të lartë të ngarkuar me politikën e jashtme, të cilët vetëm së fundmi folën për shkaktimin e disfatës strategjike ndaj Rusisë në fushën e betejës, kanë ndryshuar mendjen dhe thonë se çështje të tilla duhet të zgjidhen përmes negociatave paqësore. Është një ndryshim i arsyeshëm, një ndryshim në drejtimin e duhur, për të cilin po flet edhe zoti Borrell. Mund ta lavdëroj për këtë, por nuk mjafton. Duhet të ndërmerren hapa praktikë nëse ekziston një dëshirë reale për të zhvilluar negociata,” – u shpreh Putin.

“Sa i përket kryeministrit Orban, ai shpesh akuzohet për ndjenja proruse, gjë që është e pakuptimtë. Ai nuk ka ndjenja pro-ruse dhe nuk është një politikan pro-rus. Ai është një politikan pro-hungarez. Ai më së shumti kritikohet jo për qëndrimin që ndryshon nga qëndrimet e liderëve të tjerë evropianë, por për guximin për të mbrojtur interesat e popullit të tij. Shumë liderëve politikë në Evropën moderne u mungon guximi për ta bërë këtë, ata nuk e kanë këtë lloj guximi. E kanë zili, prandaj po e kritikojnë,” – shtoi presidenti rus ndërsa komentonte kryeministrin Orban.

LEXONI GJITHASHTU:

• Putin-Xi bashkojnë forcat: Bashkëpunim për të mbrojtur drejtësinë ndërkombëtare
• Presidenti Vuçiç takohet sot me Putin në Kinë