Putin merr leje për të dërguar ushtrinë në Ukrainë

Dhoma e Lartë e Parlamentit të Rusisë i ka dhënë autorizim presidentit Vladimir Putin për zhvendosjen e ushtrisë jashtë territorit të vendit.

Lajmi raportohet nga televizioni shtetëror “Russia Today”.

Kërkesa ka ardhur një ditë pasi Putin njohu pavarësinë e dy rajoneve në lindje të Ukrainës.

Në një dalje para mediave pak pas vendimit të Parlamentit, Putin tha se Ukraina ka shkelur marrëveshjen e Minskut.

Presidenti i Rusisë tha se nuk do të lejojë genocid në rajonet pro ruse.

“Nuk thash që do të ketë marshim të ushtrisë drejt dy republikave. Kjo do të jetë në varësi të situatës në terren”, tha Putin.

I pyetur nëse mund të ketë zgjidhje paqësore, ai deklaroi se një alternativë është demilitarizimin i Ukrainës.

Presidenti rus shtoi se zhvillimi i armëve nukleare nga Ukraina do të ishte një kërcenim strategjik për Rusinë ashtu si dhe anëtarësimi i saj në NATO.

Rusia i quan “paqeruajtëse” forcat ushtarake që do të dërgojë në territorin e Ukrainës.

Në dy rajonet, Luhansk dhe Donetsk që prej aneksimit të Krimesë në 2014 ka pasur luftime mes rebelëve të mbështetur nga Rusia dhe forcave të sigurisë së Ukrainës.