Putin shpall ligjin ushtarak, firmos dekretin për 4 rajonet ukrainase të aneksuara

Presidenti rus Vladimir Putin njoftoi të mërkurën se ka nënshkruar një dekret që parashikon zbatimin e ligjit ushtarak në 4 rajonet e aneksuara të Ukrainës.

Zonat në fjalë, Khersoni, Zaporizhia, Donjecku dhe Luhansku, nuk ndodhen tërësisht nën kontrollin rus dhe komuniteti ndërkombëtar ka deklaruar se nuk do t’i njohë kurrë ato si territore ruse.

Sidoqoftë, Putin e bëri njoftimin e tij gjatë një mbledhjeje të Këshillit të Sigurisë. Ai saktësoi se ligji ushtarak kishte hyrë në fuqi në 4 rajonet e sipërpërmendura përpara se ato të bashkoheshin me Rusinë.

“Tani duhet vetëm të formalizojmë këtë regjim me modelin e legjislacionit rus”, deklaroi Putin.

Për kreun e Kremlinit, dekreti për ato që ai i quan “pjesë të Federatës Ruse”, do t’i dërgohet menjëherë Këshillit Federal.

Ky institucion do të vlerësojë dekretin e presidentit sa më shpejt të jetë e mundur.

Në vijim të fjalimit të tij, Putin bëri të ditur se ka nënshkruar edhe një dekret që vendos kufizimin e lëvizjes në 8 rajone të tjera të Ukrainës.

Bëhet fjalë për rajonet Krasnodar, Belgorod, Briansk, Voronezh, Kursk dhe Rostov, në kufi të Ukrainës, si dhe në territoret e Krimesë dhe Sevastopolit, të aneksuara nga Moska në 2014-n.

LEXONI GJITHASHTU:

• Putin shpall gjendje lufte në katër rajonet e aneksuara ukrainase
• “20 shishe vodka dhe një letër të ëmbël”, zbulohet biseda e Berlusconi-t me Putin