Qëlloi me plumb mësuesen, zbulohet ku e gjeti armën 6-vjeçari

Është zbuluar se kujt i përket arma me të cilën një fëmijë 6-vjeçar qëlloi mësuesen e tij, në Virxhinia të Shteteve të Bashkuara të Amerikës, javën e shkuar.

Policia amerikane tha se arma i përket nënës së fëmijës dhe është e blerë ligjërisht nga kjo e fundit.

Në një konferencë shtypi të hënën, policia në Virxhinia tha se fëmija e solli pistoletën në shkollë duke e mbajtur në çantën e shpinës.

6-vjeçari qëlloi qëllimisht mësuesen e tij, Abigail ‘Abby’ Zwerner, gjatë orës së mësimit të premten. Policia tha se edhe pse e plagosur, mësuesja arriti të shoqëronte nxënësit e saj drejt një zone të sigurt, përpara se të kërkonte ndihmë.

Bëhet me dije se mësuesja 25-vjeçare ndodhet në spital në gjendje të qëndrueshme shëndetësore.

Policia në Newport News, një qytet me 180,000 banorë në veri-perëndim të Virginia Beach, tha se ata arritën të intervistonin të hënën mësuesen.

“Ajo është një heroinë”, tha shefi i policisë Steve Drew, duke shtuar se mësuesja e ka pyetur vazhdimisht për mirëqenien e nxënësve të saj që ishin në klasë në momentin e të shtënave.

LEXO GJITHASHTU:

• Arrestohet 6-vjeçari në SHBA, qëlloi me armë mësuesen
• 6-vjeçari merr armën e zjarrit në shkollë dhe qëllon mësuesen