Qershori 2024 më i nxehti që nga fillimi i matjeve

Qershori i vitit 2024 ishte qershori më i ngrohtë i regjistruar, njoftoi shërbimi i monitorimit të ndryshimeve klimatike të Bashkimit Evropian, Copernicus.

Sipas të dhënave të Copernicus, ky vit ndoshta do të kalojë vitin 2023 si më i nxehti në histori, raporton “Reuters”.

Shkencëtari Zeke Hausfader vlerëson se tani ka rreth 95 për qind shanse që viti 2024 të kalojë vitin e kaluar dhe të bëhet më i ngrohti në rekord.

Klima e ndryshuar tashmë ka sjellë pasoja shkatërruese në mbarë botën, me më shumë se 1000 njerëz që kanë vdekur nga goditja e nxehtësisë gjatë Haxhit në Mekë muajin e kaluar.

Shërbimi Copernicus i BE-së tregon se ngrohja është shkaktuar pjesërisht nga ndryshimet klimatike të shkaktuara nga ndikimi njerëzor dhe pjesërisht nga fenomeni meteorologjik El Niño.

Secili prej 12 muajve të fundit ka qenë rekord i ngrohtë, me nivele rekord të lartë të gazeve serrë nga përdorimi i karburanteve fosile, tha shkencëtarja Friederike Otto e Institutit Grantham në Kolegjin Imperial në Londër.

Ajo shtoi se muajt e ngrohtë nënkuptojnë valë më të forta të të nxehtit, si dhe shqetësime më serioze, si shirat e dendur dhe përmbytjet shkatërruese.

LEXONI GJITHASHTU:

• Mot ekstrem në Evropë, nxehtësi rekord dhe stuhi të forta
• Sot 40 gradë – Parashikimi i motit për javën