Qeveria britanike propozon 1 javë pune 4-ditore, por me të njëjtin numër orësh pune

Punëtorëve në Mbretërinë e Bashkuar mund t’u jepet e drejta të kërkojnë një javë pune katër-ditore me të njëjtin numër orësh pune, sipas propozimeve të qeverisë së re laburiste në Londër.

“Mund të punosh, për shembull, 10 orë në ditë për katër ditë në vend të tetë orësh në ditë për pesë ditë në javë. Kështu që ju ende bëni të njëjtën sasi pune, por mund t’i kushtoni më shumë kohë familjes tuaj, të jeni me fëmijë apo bëni aktivitete të tjera”, tha sot ministrja e Arsimit e Britanisë së Madhe, Jackie Smith.

Sipas saj, orari fleksibël i punës në fakt është i mirë për produktivitetin, transmeton Guardian. Ministrja mohoi se qeveria në Londër dëshiron t’ua imponojë këtë sistem pune kompanive dhe pretendimi i saj u përsërit nga zëdhënësi i qeverisë.

“Ne nuk planifikojmë t’i imponojmë punëdhënësit apo punëmarrësit një javë pune katërditore. Të gjitha ndryshimet në ligjin e punësimit do të zbatohen në bashkëpunim me përfaqësuesit e biznesit”, tha zëdhënësi.

Departamenti i Mbretërisë së Bashkuar për Biznes dhe Tregti tha se do të japë detaje të mëtejshme mbi propozimin brenda 100 ditëve.

LEXONI GJITHASHTU:

• Britania bën thirrje për bashkëpunim në Evropë përballë së djathtës ekstreme
• Komiteti i OKB-së kritikon Britaninë e Madhe për racizëm, pas trazirave atje