Qeveria greke e udhëhequr nga kryeministri Kyriakos Mitsotakis i ka mbijetuar një votimi mosbesimi në parlament të propozuar nga katër parti opozitare, pas raportimeve të mediave se qeveria manipuloi informacionin për aksidentin më të rëndë të trenit në historinë e Greqisë në shkurt të vitit të kaluar, ku humbën jetën 57 persona, kryesisht studentë.
“Unë ju bëj thirrje që të votoni për një qeveri që, pavarësisht vështirësive të mëdha, po e çon vendin përpara në mënyrë të qëndrueshme”, i tha Mitsotakis parlamentit të enjten përpara votimit.
Për besimin e qeverisë votuan 159 deputetë, ndërsa kundër 141, raporton Reuters. Partia e qendrës së djathtë Demokracia e Re e Mitsotakis ka një shumicë prej 158 në parlamentin prej 300 vendesh. Partitë opozitare kanë akuzuar qeverinë për manipulim të provave që mund të hedhin dritë mbi shkaqet e aksidentit të trenit në Larisa në një përpjekje për të pakësuar përgjegjësinë politike.
Qeveria thotë se gjyqtarët që kryejnë hetimet për aksidentin kanë të gjitha bisedat e papërpunuara në hetim, çka do të thotë se nuk ka asnjë manipulim. Një hetim nga një gjyqtar grek për aksidentin është në vazhdim dhe pritet të përfundojë në muajt në vijim.
LEXONI GJITHASHTU:
- Gazetari shqiptar: Greqia jep 2000-2500 € kur një grua lind fëmijë
- Tërmet i fortë në Greqi, sa ishte magnituda
