Qeveria kërkon 650 mln euro: Eurobond i ri brenda vitit, për çfarë do të përdoret

Ministria e Financave po planifikon të marrë një borxh të ri në tregun e huaj. Ajo ka përzgjedhur si konsulent ligjor kompaninë “Dechert”, e cila do të sigurojë shërbimin e konsulencës për eurobondin e shtatë në radhë, i cili do të jetë në vlerën e 650 milionë eurove. Kompania me ekspertizë në ligjin anglez dhe ligjin e Shteteve të Bashkuara të Amerikës për letrat me vlerë është konsideruar kompania më e mirë për ofrimin e kësaj konsulence ligjore.

Ndërkohë, Ministria e Financave është shprehur më herët se, në rast se kushtet e tregjeve gjatë vitit 2024 do të jenë të favorshme, nuk përjashtohet mundësia që borxhi të merret brenda këtij viti. Nevojat e një borxhi të tillë i përgjigjen uljes së deficitit e borxhit, por mund të shkojnë edhe për investime apo politika të brendshme.

Gjatë vitit të kaluar, Shqipëria emetoi eurobondin e gjashtë në 13 vite, me një vlerë prej 600 milionë eurosh. Eurobondi i parë i emetuar nga qeveria shqiptare ka qenë në vitin 2010, me një shumë prej 300 milionë eurosh, borxh i cili është mbyllur. Dalja e dytë ka qenë në vitin 2015, me një eurobond prej 450 milionë eurosh, dhe në vitin 2018 është shënuar dalja e tretë në tregjet ndërkombëtare për të marrë borxh. Në vitin 2020, Ministria e Financave ka emetuar një eurobond prej 650 milionë eurosh, dhe një vit më pas, në 2021-shin, është emetuar eurobondi i pestë, me kushte dhe vlerë thuajse identike me atë të vitit 2020.

LEXONI GJITHASHTU:

• Informaliteti i pagave, armiku kryesor i pensionistëve, Rama: Është grabitje
• Pensionistët në shesh, përballë qeverisë që ende premton rritje pensionesh