Qeveria ngre agjenci komunikimi dhe monitorimi të medias

Qeveria miratoi sot ngritjen e Agjencisë për Media dhe Informim që ka si një nga qëllimet kryesore koordinimin mediatik të ministrive. Drejtori i kësaj agjencie do të jetë dhe Zëdhënësi i Këshillit të Ministrave.

Agjencia do të jetë në varësi të Kryeministrit dhe misioni kryesor që ka është informimi i publikut mbi aktivitetet e gjithë qeverisë, si dhe zhvillimi i sondazheve për çështje me interes publik.

Një tjetër funksion i kësaj agjencie do të jetë dhe vëzhgimi i mediave dhe rrjeteve sociale për çështje që lidhen me politikat dhe aktivitetin e qeverisë.

Në relacionin e vendimit thuhet se Agjencia për Mediat dhe Informim ka detyrë dhe të koordinojë aktivitetin e gjithë ministrive dhe raportet e tyre me median.

Një tjetër detyrë e kësaj agjencie është krijimi i një faqeje interneti apo kanale të tjera komunikimi ku do të prodhohen materiale mediatike për qëndrimet dhe aktivitetin e kryeministrit dhe ministrave.

Sipas vendimit të qeverisë, drejtori i kësaj agjencia është njëherazi zëdhënës i qeverisë, statusi i të cilit barazohet me atë të ministrit të shtetit.

Pedagogia Jonila Godole, e cila së fundmi është angazhuar pranë PD-së si Sekretare për çështjet e të Përndjekurve Politikë, e kritikoi këtë lëvizje të qeverisë duke e konsideruar agjencinë e re si “strukturë propagande”, që “është ogur i keq për lirinë e shprehjes dhe gazetarinë”.

“Nëse kemi një agjenci informimi mediatik pranë Kryeministrit, cili rol i mbetetet Agjencisë Telegrafike? Po transmetuesit publik RTSH-së? Taksapaguesit nuk mund t’i kërkohet të paguajë tre institucione që t’i shërbejnë qeverisë dhe as nuk mund të detyrohet të paguajë kostot e ERTV-së, sepse ngado që ta kthsh këtë agjenci, ky duket të jetë misioni i saj i vërtetë,” – shkroi Godole në Facebook.