Autoritetet në Turqi kanë lëshuar 113 urdhër-arreste në lidhje me ndërtimin e godinave që u shembën si pasojë e tërmetit të së hënës.

Mediat ndërkombëtare raportojnë se policia turke ka arrestuar të paktën 12 persona, mes të cilëve shumë ndërtues.

Arrestime të tjera priten, por aksioni i policisë konsiderohet nga një pjesë e mirë e popullsisë si një përpjekje për të devijuar fajin për katastrofën.

Për vite me radhë ekspertët kanë paralajmëruar se shumë godina të reja në Turqi ishin të pasigurta për shkak të korrupsionit endemik dhe politikave qeverisëse.

Këto të fundit lejuan të ashtuquajturat amnisti për ndërtuesit që kishin shkelur rregullat urbanistike për të inkurajuar boom-in e ndërtimeve, përfshirë ato në zonat më të cënueshme nga tërmeti.

Disa mijëra ndërtesa u shembën gjatë lëkundjeve, duke bërë që të ngriheshin pyetje nëse impakti natyror i katastrofës ishte bërë më keq nga ndërhyrja e dorës së njeriut.

Me zgjedhjet që po afrojnë, e ardhmja e presidentit Erdogan është vënë në rrezik pas 20 vite në pushtet.

Ai ka pranuar vonesat në shpërndarjen e ndihmave, por gjatë një vizite në një nga zonat e prekura fajësoi fatin. “Gjëra të tilla kanë ndodhur gjithmonë. Është pjesë e fatit”, tha Erdogan.

LEXONI GJITHASHTU:

• Varreza masive për viktimat në Turqi e Siri
• Plaçkiten dyqanet në Turqi, pronarët mbrojnë me forcë subjektet