Racizëm në mitingun e Trump, mbështetësi i tij: Porto Riko, një ishull mbeturinash

Grupimet rivale të republikanëve dhe demokratëve në Shtetet e Bashkuara kanë vijuar takimet elektorale përkatëse, kur mungojnë 8 ditë nga zgjedhjet presidenciale.

Ka qenë mitingu i Donald Tramp ai që ka tërhequr më shumë vëmendjen dhe ka shkaktuar polemika, për shkak të një komediani që e quajti Porto Rikon një “ishull lundrues mbeturinash”.

Aktori Toni Hinç Klif ishte mes yjeve që u paraqitën në eventin e mbajtur në Medison Skuer Garden të Nju Jorkut, ku bëri edhe një seri batutash të karakterit racist.

“Po ndodhin shumë gjëra. Nuk e di sesa jeni në dijeni, por aktualisht ka një ishull plehrash që lundron në mes të oqeanit. Ky ishull quhet Porto Riko”, tha aktori.

Një këshilltar i Tramp nxitoi ta distanconte shefin e tij nga batuta mbi Puerto Rikon, që u dënua edhe nga figura të tjera të rëndësishme të republikanëve.

Porto Riko është një ishull amerikan në territorin e Karaibeve. Banorët e tij nuk kanë mundësi të votojnë në zgjedhjet presidenciale të Shteteve të Bashkuara, por diaspora e madhe atje e ka të drejtën e votës.

Nga ana tjetër, fushata e Herris nuk vonoi ta kritikonte kampin republikan, duke i cilësuar batutat si “përçarëse dhe poshtëruese”.

Vetë kandidatja demokrate publikoi një seri politikash që synojnë mbështetjen e banorëve në Porto Riko, duke siguruar mbështetjen e artistes Xhenifer Lopez, prindërit e të cilës janë puerto-rikanë, si dhe të reperit portorikan Bed Bani.

Më herët Herris kishte marrë mbështetjen e artistëve të tjerë të mëdhenj si këngëtarja Bijonse dhe aktori Leonardo di Kaprio, që vlerësoi angazhimin e kandidates demokrate për klimën.

Për këtë vit, në Shtetet e Bashkuara llogariten rreth 36 milionë votues hispanikë. Tradicionalisht ata kanë përbërë një elektoral të rëndësishëm për demokratët, por republikanët janë përpjekur ta zhbëjnë këtë avantazh.

LEXONI GJITHASHTU:

• Nëntë ditë nga zgjedhjet Trump miting në Manhatan, Harris në Filadelfia
• Ish-ambasadori: Deklaratat e Trump të kobshme, nuk është mirë mendërisht