‘Radoiçiç është i sanksionuar’, SHBA-të paralajmërojnë Listën Serbe

Shtetet e Bashkuara të Amerikës kanë paralajmëruar Listën Serbe për mbështetjen që i kanë dhënë nënkryetarit të subjekti politik, Millan Radoiçiç, i cili është edhe në kërkim nga autoritetet e Kosovës.

Një zyrtar i lartë amerikan ka thënë për Klan Kosova, se janë në dijeni për deklaratat e fundit të Listës Serbe për Radoiçiç.

SHBA-të i kanë kujtuar Listës Serbe se ai është i sanksionuar nga Departamenti i Thesarit i shtetit amerikan për përfshirje në korrupsion dhe krim të organizuar transnacional.

“Ne jemi në dijeni për deklaratat e fundit për Milan Radojçiqin. Milan Radojçiq është sanksionuar nga qeveria amerikane për përfshirje në korrupsion dhe krim të organizuar transnacional”, thuhet në këtë përgjigje.

Radoiçiç ka qenë në qendër të akuzave nga ministri i Punëve të Brendshme të Kosovës, Xhelal Sveçla i cili tha se Millan Radoiçiç, është njëri ndër krerët e strukturave kriminale që po kryejnë sulme në veri të vendit.

Radoiçiç nuk i ka komentuar këto pretendime dhe partia e tij, Lista Serbe i ka hedhur poshtë ato, duke i quajtur akuzat të pabaza.

Ai i ka shpëtuar dy herë arrestimit nga Policia e Kosovës, duke u arratisur nga Kosova, teksa  vazhdon të jetë në listën e të kërkuarve, pasi ende ekziston një fletarrestim aktiv, për shkak të përfshirjes së tij të dyshuar në rastin “Brezovica”.

Në fillim të muajit korrikut, publikoi një video nga rrethina e Leposaviçit, në veri të Kosovës, me mesazhin: “Jam këtu, jam kthyer dhe ju e dini se çfarë do të thotë kjo”.

LEXONI GJITHASHTU

• ‘Sanksione nga SHBA, në kërkim nga Kosova’, kush është Radoiçiç i listës serbe
• ‘Akuza të pabaza për Radoiçiç’, lista serbe reagon ndaj ministrit Sveçla
• Sveçla: Radoiçiç, në krye të kontrabandistëve që sulmojnë Policinë në veri