Raketat Tomahawk drejt Ukrainës? Lëvizja që mund të bllokojë Kremlinin

Në ditën kur Rusia rifilloi bombardimet e rënda ndaj qyteteve të mëdha ukrainase, editoriali i Financial Times me titullin “Pse Ukraina po e fiton luftën” nga historiani izraelit Yuval Noah Harari, tingëllon tepër optimist. Edhe skenari i përmendur nga presidenti i SHBA, Donald Trump, në margjinat e Asamblesë së Përgjithshme të OKB-së përkatësisht rikthimi i territoreve të pushtuara nga Rusia në duart e Kievit duket i shkëputur nga realiteti në terren, sipas shumicës së analistëve ushtarakë.

Gjenerali Valery Zaluzhny, sot ambasador në Londër dhe ish-shef i shtabit të përgjithshëm ukrainas, e ka quajtur operacionin në Kursk një gabim strategjik që i kushtoi Ukrainës shumë jetë njerëzore. “Nuk e di çmimin e këtyre veprimeve, por është e qartë se ishte tepër i lartë”, ka deklaruar ai në një shkrim të botuar online. Gjatë gjithë verës, forcat ukrainase janë përballur me presion të madh në lindje të vendit, duke humbur terren dhe duke u detyruar të tërhiqen për të shmangur humbje të mëtejshme.

Megjithatë, situata mbetet e ndërlikuar: edhe Moska nuk po fiton. Siç shprehet gjenerali australian në pension, Mick Ryan, është e vështirë të quhet sukses fakti që, tre vjet pas fillimit të pushtimit, Rusia kontrollon vetëm 20% të territorit të Ukrainës, me humbje të mëdha njerëzore dhe logjistike. Një krahasim i tillë me ndërhyrjen e SHBA në Irak në vitin 2003 e bën të qartë se suksesi i Rusisë është shumë larg objektivave fillestare.

Një element që mund të ndryshojë dinamiken është drita jeshile e pritshme nga administrata e presidentit Trump për furnizimin e Ukrainës me raketat Tomahawk armë me rreze të gjatë veprimi dhe fuqi të madhe shkatërruese, të përdorura më parë në operacione si “Stuhia e Shkretëtirës” në Irak apo ndërhyrjet në Siri dhe Karaibe. Ky furnizim, të cilin as administrata e Joe Biden nuk e kishte lejuar më parë për shkak të frikës nga reagimi i Kremlinit, nuk do të ndikonte ndjeshëm në rezervat ushtarake të SHBA, por do të ishte një mesazh i qartë për Moskën.

Presidenti ukrainas Volodymyr Zelensky ka deklaruar se vetë leja për blerjen e këtyre raketave do të kishte vlerë të madhe strategjike dhe simbolike. Kjo do t’i jepte një shtysë të re fushatës “DeepStrike” të Kievit, që përfshin sulme të thella në territorin rus. Vetëm në dy muajt e fundit, forcat ukrainase pretendojnë se kanë goditur 85 objektiva me rëndësi të lartë në tokën ruse, përfshirë baza ushtarake, depo, aeroporte dhe fabrika të industrisë ushtarake.

Nga ana tjetër, gjenerali ukrainas Oleksander Syrsky ka theksuar se objektivat strategjikë të Moskës për këtë vit si avancimi në rajonet Kharkiv, Sumy, Zaporizhzhia dhe Kherson nuk janë arritur. Ndërsa është e vështirë të flitet për një fitore të Ukrainës në terren, është po aq e qartë se Rusia nuk po i arrin synimet e saj dhe nuk pritet t’i arrijë në javët e ardhshme.

Me fjalë të tjera, Ukraina nuk po e humbet luftën dhe kjo, në këtë fazë të konfliktit, është një arritje në vetvete.

LEXONI GJITHASHTU:

• Rusia godet Kievin dhe Zaporizhian, një nga sulmet më të mëdha ajrore ndaj Ukrainës
• Lukashenko: Putin gati të ofrojë një propozim “shumë të mirë” për paqen në Ukrainë