Rama-Bashës: Mos imito atë të ‘Foltores’, origjinali është gjithmonë më i besueshëm se kopja

Kryeministri Edi Rama nga foltorja e Kuvendit i sugjeroi kreut aktual të PD, Lulzim Basha që të mos imitonte ish-kreun e kësaj partie, Sali Berisha pasi siç tha origjinali është gjithmonë më i besueshëm se kopja.

Rama iu referuar debatit të ashpër të kreut të PD me deputetin socialist Eduard Shalsi më herët, duke i kujtuar se fjalë të tilla të ulëta nuk i kanë hije një babai që fëmijëve të vet u mëson mos t’i përdorin kurrë.

“Mos imito atë të foltores se origjinali është gjithmonë më i besueshëm se kopja. Dhe sa më shumë klith si ai i foltores, aq më shumë dukesh personazh i qajtores. Një burrë që vë kujën me fjalë që si prind u thua fëmijëve të tu se nuk përdoren kurrë dhe bën këtë në mes 139 burrave e grave dhe sa e sa të tjerë që na ndjekin, është një burrë në pikë të hallit. Hallin që ke, sado të ta qajmë, nuk ka zgjidhim dot”, tha kryeministri.