Rama: Dibra, jastëku i gjelbër i Tiranës, destinacion për miliona turistë

Kryeministri Edi Rama ishte këtë të mërkurë për një seri takimesh në qarkun e Dibrës. Fillimisht kryesocialisti vizitoi punimet në tunelet e rrugës së Arbrit.

Më tej Rama zhvilloi një takim me të rinjtë në Burrel, Rama të cilëve iu kërkoi nga ata përfshirje në politikë, pasi sipas tij, përmes politikës në Shqipëri, është duke u kryer vaksinimi dhe është duke vijuar puna për rindërtimin e banesave të dëmtuara nga tërmeti i nëntorit 2019.

Pas Burrelit, takimin kryesor kryetari i Partisë Socialiste e zhvilloi në Peshkopi, nga ku u shpreh se me përfundimin e rrugës së Arbrit, Dibra do të kthehet në destinacionin turistik, pasi distanca me Tiranën do të shkurtohet ndjeshëm.

“Jo më një Tiranë kryeqytet dhe një Dibër e izoluar, por një Tiranë që do të jetë graviteti i jetës ekonomikë dhe sociale dhe një Dibër që do të jetë jastëku i gjelbër i metropolit të Shqipërisë”, u shpreh Rama.