Rama e Vuçiç rrëzojnë pretendimin e Lavrov për ‘Open Balkan’

Kryeministri i Shqipërisë, Edi Rama dhe Presidenti i Serbisë, Aleksandër Vuçiç përjashtojnë çdo mundësi që ‘Open Balkan’ të jetë një ide e Rusisë.

Gjatë Samitit të mbajtur në Ohër ku merrnin pjesë liderët e 5 vendeve të Ballkanit Perëndimor, Rama tha se deklarata e Lavrov ka qenë sarkazëm.

Sipas Kryeministrit të Shqipërisë iniciativa e ‘Open Balkan’ mbështetet nga SHBA e BE dhe prezenca e përfaqësuesve të tyre në takim e tregon këtë.

“Lavrov është peshkaqen i nivelit të lartë në diplomacinë botërore që është i njohur për sarkazëm”, deklaroi Rama.

Kryeministri i Shqipërisë bëri thirrje që të lihen pas mosmarrëveshjet historike duke sugjeruar që të ndiqet shembulli i tejkalimit të këtyre pengesave nga rasti SHBA-Japoni.

“Të ndërtojmë një histori të re si të gjithë popujt që kanë ditur të ikin nga historitë e së shkuarës. Japonia dhe SHBA janë sot aleatë të ngushtë pas dy bombave atomike”, tha Rama.

Presidenti i Serbisë, Vuçiç gjithashtu u shpreh se Rusia nuk ka pasur asnjë ndikim në krijimin e idesë së ‘Open Balkan’.

Vuçiç deklaroi se gjithçka është bërë me iniciativën e Ramës, Zaevit dhe tij.

“Askush tjetër përveç nesh nuk e kishte idenë e Ballkanit të Hapur”, deklaroi presidenti serb.

Shkak për këtë interpretim është bërë deklarata e ministrit të Jashtëm të Rusisë, Sergei Lavrov.

Sipas tij krijimi i ‘Open Balkan’ është një ide e Serbisë që po realizohet me mbështetjen e Rusisë.

LEXONI GJITHASHTU:

Vuçiç falënderon Ramën: S’do kishte Ballkan të Hapur pa vendosmërinë e tij

Rama nga Ohri: Do të gjejmë një zgjidhje të përbashkët për krizën