Rama: Ilir Meta nuk ka më asgjë prej presidenti, sot çeli një fushatë brenda opozitës. PD, servis figurantësh

Në mbyllje të Asamblesë së Partisë Socialiste, kryeministri Edi Rama bëri edhe një koment për protestën e organizuar nga presidenti Ilir Meta. Z. Rama risolli në vëmendje raportin e ndërmjetëm të Komisionit Evropian që rekomandon hapjen e negociatave me Shqipërinë.

 “Sot në Bruksel del një raport që minimalisht duhet ta gëzonte një president të republikës. Por që ta hidhëronte në pikën që të rishpërthejë para të gjithëve është diçka të për të qarë. Unë qesh se për mua ëshytë e pritshme”, tha kryeministri, ndërsa rikujtoi se të njëjtin reagim presidenti pati edhe pas suksesit të Shqipërisë në konferencën e donatorëve për tërmetin.

I pyetur lidhur me deklaratën e presidentit se do të firmosë dekretin për shpërndarjen e parlamentit, z, Rama ritheksoi edhe një herë se parlamenti nuk do të njohë asnjë lloj dekreti të tillë, ndërsa nënvijëzoi se keqardhje e tij më e madhe për protestën e sotme ishte fakti se PD ishte kthyer në figurante të presidentit.

“E kam thënë edhe më parë; presidenti i republikës nuk mund të firmosë dekrete të tilla. Ndërsa Iliri, që nuk ka asgjë prej presidenti më dhe sot ka çelur një fushatë brenda opozitës, mund të firmosë edhe një dekret për t’i shpallur luftë Amerikës, por parlamenti nuk do ta njohë.

Shqipëria reale ka bërë progres dhe lajmi i keq është sot se PD u kthye në një servis figurantësh nga presidenti”, tha kreu i qeverisë.

Lexoni gjithashtu

Paralajmërimi i Metës: Nëse s’më marrin seriozisht, pas 15 marsit do të firmos shpërndarjen e Parlamentit

Presidenti Meta akuzon “puçistët” dhe “organizatat mafioze ndërkombëtare”