Rama inspekton ndërtimin e banesave të dëmtuara nga tërmeti në Dajt: 359 kantiere të hapura në Tiranë

Kryeministri Edi Rama i shoqëruar nga kreu i bashkisë së Tiranës Erion Veliaj dhe ministri për Rindërtimin Arben Ahmetaj ishte sot në zonën e Dajtit për të parë nga afër kantieret ku po ndërtohen banesat e reja për familjet e mbetura pa strehë nga tërmeti i 26 nëntorit.

Kryebashkiaku Veliaj tha se në Tiranë janë aktualisht 359 kantiere të hapura ose shumë afër fundit nga 850 shtëpi individuale do të ndërtohen nga e para.

“Kemi ruajtur faturat e të gjithë akt-konstatimet e të gjithëve, edhe kur dikush shpif për 2 minuta e verifikojmë, por 99 për qind e njerëzve janë super të ndershëm dhe korrektë”, tha kryebashkiaku Veliaj në përgjigje të atyre që i cilësoi spekulantë.

Kryeministri kërkoi informacion sa i përket ndërtimi të pallateve të reja dhe shembjes së ndërtesave të dëmtuara, teksa mori nga kryebashkiaku përgjigjen se ky proces do të nisë fillimisht me shkollat e më tej me pallatet.

“Kur do fillojmë me prishjen e pallateve se nuk beson njëri që do bëhen pallate të reja”, tha kryeministri.

Prej disa kohësh tashmë Partia Demokratike denoncon rastet e personave të ndryshëm të cilët nuk kanë gjetur zgjidhje për strehimin e tyre rreth një vit pas tërmetit shkatërrimtar të 26 nëntorit.

Lexoni gjithashtu:

PD denoncon rastin e qytetarit nga Shijaku, vështirësia në çadër e detyroi të kthehet në shtëpinë e shkatërruar

PD denoncon rastin e qytetares nga Tirana, prej 1 viti jeton bashkë me fëmijët në shtëpinë e shkatërruar nga tërmeti