‘Rama ka kapur çdo pushtet’, Andi Bushati: Kontrollon SPAK dhe Autoritetin e Dosjeve

Analisti Andi Bushati thotë se kryeministri Edi Rama i ka kapur të gjitha pushtetet në vend.

Në emisionin “Now” në “Euronews Albania”, Bushati u shpreh se Rama kontrollon Strukturën e Posaçme (SPAK) dhe Autoritetin e Dosjeve.

“E rëndësishme është që ne po eskalojmë ditë pas dite drejt një shteti diktatorial. Një shteti diktatorial, që SPAK-un e ka bërë si linesin e vetë, që Autoritetin e Dosjeve e ka bërë si pampersin e vetë. Jep fishkëllimën Edi Rama dhe këti vihet i gjithë shteti në veprim. Vihet shteti në veprim për të ndaluar ata maskarenj që po luftojnë Edi Ramën.

Historia e dosjes së Ilir Metës, pavarësisht nëse ai ka qenë spiun ose jo, është dëshmia e qertë që Edi Rama ka kapur shtetin. Ai i thotë SPAK-ut, e gjithë Shqipëria pret të hetojmë Ilir Metën, SPAK-u fillon hetimet. Ne e dimë që s’ka njerëz të ndershëm në arenën tonë politike, por këtu po del një maskara mbi maskarenjtë, që po zhduk edhe maskarenjtë e tjerë”, theksoi analisti.

Kreu i Partisë së Lirisë, Ilir Meta ka kallëzuar Autoritetin e Dosjeve, ashtu siç e kishte paralajmëruar pak javë më parë.

Meta sqaron se kallëzimi është bërë për shkeljet e rënda dhe të qëllimshme që i ka bërë ky institucion, ligjit organik për dosjet e ish-Sigurimit të Shtetit.

Ai hedh edhe akuza ndaj Ramës, ku shprehet se kemi të bëjmë me një shantazh politik.

Ndërsa, Autoriteti i Dosjeve thotë se akuzat e Metës janë të pabazuara e dashakeqe ndaj institucionit dhe fyese për dinjitetin e secilit prej anëtarëve.

LEXONI GJITHASHTU

• Andi Bushati: Nëse Meta del spiun, Berisha dhe Rama të shporren nga jeta politike
• ‘Akuzat janë dashakeqe dhe fyese’, Autoriteti i Dosjeve reagon për padinë e Metës
• Ilir Meta kallëzon Autoritetin e Dosjeve: Në shërbim të shantazhit politik