Rama komenton deklaratën e Rishi Sunak: Krimi nuk ka etni

Kryeministri Edi Rama ka përfunduar mbledhjen me drejtuesit e qarqeve dhe më pas ka dhënë një deklaratë për mediat.

Euronews Albania e pyeti kryeministrin për deklaratën e Rishi Sunak i cili deklaroi se do të rishikonte ligjin për emigrantët e paligjshëm.

“Kjo është një kërkesë e imja që në kohën kur Boris Johnson ka qenë ministër i Jashtëm, ose ndryshe siç e quajnë sekretari i Punëve të Jashtme të Britanisë së Madhe dhe e kam përsëritur vazhdimisht sepse sa herë kanë ardhur dhe kanë ndarë me ne këtë shqetësim unë kam qenë konsistent në të njëjtën gjë. Mos flisni për një krim shqiptar, krimi është krim dhe nuk ka etni. Nëse keni problem dhe doni ndihmën tonë sepse ne jemi zgjedhur për të qeverisur Shqipërinë dhe jo Britaninë e madhe ne jemi të gatshëm që bashkë me ju të ngremë një skuadër speciale siç e kemi bërë me vende të tjera,” – u shpreh Rama.