Rama në Golem: Përpara qershorit do vaksinohen punonjësit e hoteleve

Nga një takim me disa operatorë turistikë në Golem, kryeministri Edi Rama ka deklaruar se në qershor do ketë përfunduar vaksinimi i punonjësve të hoteleve dhe kjo sipas tij, do të ndihmojë në lehtësimin e kufizimeve të sezonit turistik.

“Me vaksinimin masiv jemi të bindur se do ta këpusim zinxhirin e infektimeve në shumë pjesë. Do hapim rrugën për një sezon turistik të lehtësuar. Kemi në plan të mbështesim sapo të kryhet kjo faza e  parë e moshave më të prekshme nga armiku i padukshëm do të bëjmë vaksinimin e punonjësve në fabrika, njëkohësisht edhe vaksinimin e zinxhirit të punonjësve të  hoteleve sidomos aty ku ka dhe masë njerëzish”, tha Rama.

Ai tha se ky proces do të përfundojë brenda muajit qershor.

“Po bëjmë gati tabelën e numrave dhe sapo të kalojmë këtë fazë të parë nga maji besoj do jemi gati që në qershor kjo gjë të jetë kryer”, shtoi ai.

Kryeministri i vendit, pak ditë më parë deklaroi publikisht se brenda majit objektivi është që të marrin vaksinën 500 mijë qytetarë.