Rama: Pas të moshuarve, radhën e vaksinimit e kanë vajzat e gratë e fasonerive

Pas përfundimit të vaksinimit të të moshuarve mbi 70 vjeç, do të fillojë vaksinimi i vajzave dhe grave që punojnë në fasoneri.

Lajmi u bë me dije nga kryeministri Rama gjatë një vizite që zhvilloi në një fasoneri në qytetin e Shkodrës.

“Edhe një gjë tjetër dua t’ju them që sapo të mbarojmë me vaksinimin për moshën 70 vjeç e lart do të zbresim poshtë dhe të parët që do vaksinojmë do jenë të gjitha gratë dhe vajzat e fasonerive. Vajzat dhe gratë, burrat kismet…kismet”, theksoi Rama.

Kryeministri Rama nga sheshi ‘Skënderbej’ pak ditë më parë teksa ndoqi nga afër procesin e nisjes vaksinimit masiv u shpreh optimist se brenda muajit maj, gjysmë milionë shqiptarë do të jenë vaksinuar.