Rama për 3 propozimet e opozitës, Bushati: Basha të pozicionohet ndaj njeriut që në politikë ka dhe gurin dhe arrën

Kreu i PD-së Lulzim Basha i ka propozuar qeverisë 3 ndryshime kushtetuese si reforma territoriale, vetingu i politikanëve dhe reforma zgjedhore.

Kryeministri Edi Rama u shpreh mbrëmë në emisionin “Now” se është i gatshëm për dialog nëse opozita e bind për këto ndryshime, mirëpo për analistin Andi Bushati ajo çfarë z. Rama ka treguar nuk është tolerancë por arrogancë e pushtetit.

Andi Bushati tha në emisionin “Shock” se Lulzim Basha i propozoi këto ndryshime menjëherë pasi Edi Rama propozoi zgjatjen e afatit të vetingut, duke mos i lënë hapësirë opozitës për të diskutuar nëse afati duhet zgjatur apo jo.

“Përgjigja që dha Rama dje që edhe mund të dialogojë për tre propozimet e Bashës, është përgjigja e një politikani që thotë: Unë mund të bëj çfarë të dua, për ndonjë nga kërkesat edhe mund të diskutojmë”, u shpreh Andi Bushati.

Andi Bushati tha se Lulzim Bashës i takon që të pozicionohet ndaj një njeriu “që ka edhe gurin edhe arrën”, me idenë se Edi Rama është i plotfuqishëm.

Sa u përket propozimeve të Lulzim Bashës, analisti Baton Haxhiu tha në emisionin  “Shock” se është kundër vetingut të politikanëve, pasi duket si diçka “populiste, me fakte ta eliminojmë përgjithmonë”.