Rama: Unë dhe PS garantuesit e vetëm për mbijetesën e SPAK! Bufi dhe këneta…

Kryeministri Edi Rama, duke iu përgjigjur komentuesve në rubrikën “Sy më sy”, u ndal sërish te Reforma në Drejtësi dhe puna e SPAK-ut, duke theksuar se Partia Socialiste është e vetmja garanci për mbijetesën e këtij institucioni.

“SPAK-u nuk është i imi, por i Kushtetutës dhe i Reformës në Drejtësi. Këtë reformë e kam marrë përsipër me autoritet të plotë, bashkë me Partinë Socialiste. Besoj se tani jeni më të qartë. Askush sot nuk mund të thotë se SPAK-u është i kapur nga unë apo nga ndonjë tjetër. Ai është i pavarur. Ajo që ne nuk duam dhe nuk do ta tolerojmë kurrë është një sistem drejtësie të njëanshëm – të pavarur, por jo profesional,” tha Rama.

Kryeministri u ndal edhe te debatet mbi ndikimin e ndërkombëtarëve në SPAK, duke theksuar se institucioni është i qëndrueshëm pavarësisht ndryshimeve në mbështetjen ndërkombëtare.

“Tani që Amerika është tërhequr, besoj jeni më të qartë: nëse SPAK-un do ta kishte sjellë Amerika, tani që ajo është tërhequr, do ta kishte marrë me vete. Por SPAK-u është këtu dhe ka vetëm një garanci për mbijetesën dhe ecurinë e tij përpara: lufta e gjithanshme kundër baltës politike dhe mediatike. Në krye të kësaj lufte është Partia Socialiste e Shqipërisë, me mua në drejtim të saj. Kështu që, rrotullojeni si të doni, Reformën në Drejtësi e kam bërë unë me Partinë Socialiste dhe e garantoj unë me Partinë Socialiste – askush tjetër,” tha Rama.

Megjithatë, ai theksoi se nuk mund të pranohet që në emër të pavarësisë së drejtësisë të shkelet e drejta e individëve.

“Nuk mund të pranojmë që, në emër të pavarësisë, të intimidohen njerëzit që merren në pyetje dhe që paraburgimi të kthehet në normë, duke u përdorur për të arrestuar dhe mbajtur të izoluar këdo, pa një proces gjyqësor të drejtë. Kushtet për burgosjen e dikujt janë të qarta dhe nuk mund të bazohen vetëm në disa kritere të interpretuara sipas dëshirës. Megjithatë, kjo është një çështje që kërkon debat dhe diskutim demokratik,” tha Rama.

Sa i përket objektivave të së ardhmes, kryeministri theksoi se viti 2025 do të jetë vendimtar për ndërtimin e një sistemi të drejtë dhe të barabartë të drejtësisë.

“Në vitin 2025, sfida jonë është ndërtimi i një sistemi drejtësie të drejtë dhe të barabartë. Pjesa e parë e kësaj sfide duket e fituar, pavarësisht kostove dhe problemeve që kanë dalë rrugës – sepse ka gjëra që nuk shkojnë siç duhet, edhe me SPAK-un. Nuk ka rënë nga qielli, është një strukturë dhe institucion i ri, me sfidat e veta. Por, gjithsesi, ai ka krijuar besimin te pavarësia e tij,” përfundoi Rama.

LEXONI GJITHASHTU:

• Rama tregon kur shpërndahet bonusi i pensionistëve
• Rama: Vota e diasporës, vendimtare për Shqipërinë 2030 dhe integrimin në BE