Rama vizitë zyrtare në Egjipt, premton linjë ajrore direkte Tiranë-Kajro

Një linjë ajrore që lidh drejtpërdrejt Shqipërinë me Egjiptin do të shtohet në aeroportin e Rinasit. Lajmin e bën të ditur, kryeministri Edi Rama, i cili ka shkuar për vizitë zyrtare në Kajro.

“Marr me vete premtimin për t’u kujdesur personalisht për të vendosur linjën e drejtpërdrejtë të fluturimit mes Kajros dhe Tiranës. Nuk e di nga pala egjiptiane, por nga ajo shqiptare ju siguroj se avionët nuk do të jenë kurrë bosh”, tha kryeministri Rama.

Nga ana tjetër, homologu i tij Madbouly gjatë fjalës së tij ka shprehur nevojën për forcimin e tregtisë mes dy vendeve.

“Ky takim do të nxisë bashkëpunimin për ekonominë dhe investimet. Theksova nevojën e ngritjes së një komisioni të përbashkët të këshillit të biznesit të Shqipërisë dhe atij të Egjiptit”, u shpreh Moustafa Madbouly, kryeministër i Egjiptit.

Kreu i qeverisë, u prit me ceremoni zyrtare në aeroportin e Kajros, mandej ministrat e kulturës së dy vendeve, nënshkruan edhe 3 marrëveshje për bashkëpunimin kulturor në fushën e muzeve dhe librit.