Ramush Haradinaj nuk heq dorë nga synimi për t’u bërë president i Kosovës

Kryetari i Aleancës për Ardhmërinë e Kosovës (AAK), Ramush Haradinaj deklaroi sot se janë në përmbyllje të listës me kandidatët për deputetë në zgjedhjet e 14 shkurtit.

Përmes një konferencë për media, ish-kryeministri i vendit tha se synon postin e presidentit duke qenë  “mbrojtës i interesave të shtetit”.

Ai shtoi se AAK-ja pas zgjedhjeve do ta lë të hapur mundësinë për koalicione me partitë politike.

“Pas zgjedhjeve nuk do të kemi vija të kuqe me asnjë subjekt politik”, tha ai.

Partia e drejtuar nga Ramush Haradinaj nuk ka krijuar koalicion parazgjedhor për garën e zgjedhjeve të 14 shkurtit, të cilat do të mbahen pas vendimit të Kushtetueses, e cila argumentoi se Qeveria Hoti është zgjedhur në mënyrë jo legjitime për shkak të votës së deputetit Etem Arifi.