Raporti i KiE-së për zgjedhjet, Gerta Meta: Realist, përdorimi i burimeve shtetërore, problematika mbizotëruese

Drejtuesja e Koalicionit të Vëzhguesve Vendorë, Gerta Meta komentoi në Euronews Albania raportin e Asamblesë Parlamentare të Këshillit të Europës për zgjedhjet, ku theksoi se gjetjet në raport ishin realiste dhe nuk kishte surpriza.

“Raporti i djeshëm i publikuar nga Asambleja Parlamentare e Këshillit të Europës nuk ishte surprizë, sepse këto janë gjëra që ne i kemi diskutuar së bashku. Edhe ne si vëzhgues vendorë e kemi thënë fjalën tonë, të gjitha ato që janë të deklaruara në raportin e Asamblesë Parlamentare, janë realiste”, u shpreh znj. Meta.

Duke iu referuar edhe gjetjeve në raport, ajo deklaroi se përdorimi i aseteve dhe burimeve shtetërore ishin një problematikë mbizotëruese e zgjedhjeve të 25 prillit.

“Nuk mund të heshtësh dhe të thuash që përdorimi i aseteve dhe burimeve shtetërore nuk ishte një problem. Ishte mbizotëruese si një problematikë në zgjedhjet e 25 prillit”, tha ajo teksa shtoi se institucionet përkatëse duhet të mbajnë qëndrimin e tyre sa më shpejt të jetë e mundur.

“Problematikë e madhe është perceptimi që në Shqipëri vazhdon të blihet dhe shitet vota e shqiptarëve. Edhe në raportin e ndërkombëtarëve, ngrihet si shqetësim, por nuk jemi në shifra konkrete dhe në situata konkrete”, u shpreh znj. Meta.

Asambleja Parlamentare e Këshillit të Europës në raportin për zgjedhjet e 25 prillit në Shqipëri, evidentoi si shqetësime kryesore: keqpërdorimin e burimeve shtetërore dhe mbizotërimin e akuzave për blerje të votave në gjithë vendin.

Në raport nënvizohet se gjatë ditës së zgjedhjeve nuk u respektuan masat anti-COVID.

LEXONI GJITHASHTU:

• Raporti i KiE, Bushati: Tregoi se procesi zgjedhor ka qenë më i pastri i zhvilluar ndonjëherë
• Raporti i KiE për “25 prillin”, shqetësim keqpërdorimi i burimeve shtetërore dhe akuzat për blerje vote