Raporti i OKB: Rreth 282 milionë njerëz u përballën me urinë akute vitin e kaluar

Pasiguria ushqimore u përkeqësua në mbarë botën në vitin 2023, me rreth 282 milionë njerëz që vuajnë nga uria akute për shkak të konflikteve, veçanërisht në Gaza dhe Sudan, sipas agjencive të Kombeve të Bashkuara dhe grupeve të zhvillimit.

Ngjarjet ekstreme të motit dhe goditjet ekonomike shtuan numrin e atyre që përballen me pasiguri akute ushqimore, i cili u rrit me 24 milionë njerëz krahasuar me vitin 2022, sipas një raporti global mbi krizat ushqimore nga Rrjeti i Informacionit të Sigurisë Ushqimore (FSIN) të publikuar të mërkurën.

Raporti, i cili e quajti perspektivën globale “të zymtë” për këtë vit, është prodhuar për një aleancë ndërkombëtare që bashkon agjencitë e OKB-së, Bashkimin Evropian dhe organet qeveritare dhe joqeveritare.

Viti 2023 ishte i pesti radhazi me një numër në rritje të njerëzve që vuajnë nga pasiguria akute ushqimore e përcaktuar si kur popullatat përballen me privim ushqimor që kërcënon jetët ose jetesën, pavarësisht nga shkaqet ose kohëzgjatja.

Pjesa më e madhe e rritjes së vitit të kaluar ishte për shkak të mbulimit të zgjeruar gjeografik të raportit dhe kushteve të përkeqësuara në 12 vende.

Më shumë zona gjeografike përjetuan “goditje të reja ose të intensifikuara” ndërsa pati një “përkeqësim të dukshëm në kontekstet kyçe të krizës ushqimore si Sudani dhe Rripi i Gazës”, Fleur Wouterse, zëvendësdrejtoreshë e zyrës së emergjencave brenda Organizatës së OKB-së për Ushqim dhe Bujqësi (FAO), tha për agjencinë e lajmeve AFP.

LEXONI GJITHASHTU:

• Shefi i OKB-së për të drejtat e njeriut: I tmerruar nga varret masive në Gaza
• Kreu i OKB: Lindja e Mesme është në buzë të greminës