Raporti i Vlerësimit të Nevojave pas Katastrofës ka përllogaritur një shifër prej 75.5 milionë eurosh si humbjet e përgjithshme në turizëm pas tërmetit të 26 nëntorit në Shqipëri.
Ky raport është paraqitur dhe përgatitur nga qeveria dhe ekspertët e Komisionit Evropian, Bankës Botërore dhe sistemit të organizatave të Kombeve të Bashkuara.
Raporti i klasifikon dëmet në turizëm, si humbje prej mbylljes së pjesshme të biznesit (për shkak të dëmtimit, deri në riparim dhe rikthim të plotë në funksionim.); humbje në punësim; humbje për shkak të rënies së vizitorëve; dhe kostot për heqjen e inerteve të shkatërrimeve
Turizmi është industria numër një e vendit dhe për vitin 2019 kontribuoi me rreth 2 miliardë euro në prodhimin kombëtar.
Zonat e prekura janë të lidhura kryesisht me turizmin bregdetar dhe kulturor. Të 11 bashkitë e dëmtuara kanë 117 hoteleve të regjistruara, por vetëm 18 prej totalit u dëmtuan nga tërmeti dhe që të gjitha ndodhen në Durrës.
Durrësi përben destinacionin kryesor për turistët me paketa udhëtimesh.
65 për qind e njësive pritëse për turistët në Durrës janë apartamente, vila dhe dhoma të privatëve, shumica jo zyrtare. Ende nuk dihet sa nga këto njësi janë dëmtuar.
Qeveria dhe Raporti i Vlerësimit kanë planifikuar një shumë prej 10.8 milionë euro për rindërtimin dhe rimëkëmbjen e turizmit, ku nevojat për rindërtim janë 5.6 milionë euro dhe nevojat për rimëkëmbje janë 5.3 milionë euro.
