Raporti i Zyrës kundër narkotikëve në Francë: Nuk ka qoshe të vendit pa kokainë

Franca është kthyer në një shtet ku nuk ka më një qoshe të vendit pa drogë. Kështu thotë një raport i zyrës kombëtare kundër narkotikëve, OFAST, që ka ngritur shqetësimin për shkallën e trafikut të kokainës dhe kapjen prej saj të shoqërisë franceze.

E cilësuar si “cunami i bardhë” nga ministri i Brendshëm, Bruno Retailleau, raporti paralajmëron për një rritje shpërthyese të pranisë së kokainës, duke e konsideruar atë një “kërcënim ekzistencial” dhe një formë “anti-kulture”, të udhëhequr nga dhuna dhe pandëshkueshmëria.

Vetëm në 6 muajt e parë të 2025-s, autoritetet sekuestruan 37.5 tonelata kokainë, 45 për qind më shumë se e njëjta periudhë e vitit 2024. Sipas OFAST, bëhet fjalë për një kuotë rekord që tregon se sa thellë ka depërtuar narkotrafiku në mbarë vendin.

Vetëm në 2024-n, 367 vrasje apo tentativa vrasjeje të lidhura me dhunën e drogës u regjistruan në 173 qytete franceze.

“Marrja nën kontroll e lagjeve nga bandat nxit kriminalitetin e përditshëm, normalizon dhunën dhe paratë e pista, në kuadër të një anti-kulture në rritje, që dëmton përpjekjet për  të përmirësuar qytetet dhe për të ndihmuar njerëzit të integrohen në shoqëri”, thotë raporti.

Dokumenti në fjalë vë në dukje se si disa rrjete të trafikut të drogës, në disa qytete kanë shkuar përtej aktivitetit kriminal, duke shtrirë kontrollin e tyre tek komunitetet.

Në disa zona, bosët e drogës kanë tejkaluar ndikimin e autoriteteve lokale, duke vepruar de fakto si autoritete të lagjeve.

LEXONI GJITHASHTU:

• VIDEO/ Franca, Gjermania dhe Spanja dërgojnë ndihma në Gaza përmes ajrit
• Pas Britanisë dhe Francës, edhe Kanadaja drejt njohjes së Palestinës në shtator