Koçiu reagon për protestën: Të shkosh me molotovë drejt policisë është provokim i hapur

Ministrja e Punëve të Brendshme në detyrë, Albana Koçiu, reagoi lidhur me protestën e opozitës, duke e cilësuar atë një provokim të hapur. Ajo theksoi se përdorimi i molotovëve nuk përbën akt proteste, por një përpjekje për të delegjitimuar forcat e rendit dhe për të përshkallëzuar tensionet në rrugët e kryeqytetit.

“Të shkosh me molotovë në duar drejt godinës së Policisë së Shtetit nuk është një akt proteste, por një provokim i hapur dhe një dëshirë e ethshme për përshkallëzim, duke tentuar të delegjitimohet forca e ligjit përballë presionit të rrugës. Marshojnë si çlirimtarë në rrugët e kryeqytetit, ndërkohë që janë po ata vetë që shqiptarët i kanë lënë jashtë rrugës së politikës me votë. Duke u fshehur pas bandës së molotovëve, ky Don Kishot që grindet me koshat e mbeturinave si me mullinjtë e erës, e ka kthyer partinë e parë pluraliste në një repart zjarrvënësish. Ky zjarr nuk djeg dot asnjë reformë dhe as të ardhmen europiane të Shqipërisë, por vetëm mbetjet e fundit të një opozite që nuk di më as kush është, as ku po shkon dhe as pse po bërtet”, shkruan Koçiu.