Reali “mbret” në Champions, finalist mes polemikash për një gol të anuluar

Reali i Madridit është kthyer pas 2 vitesh në finalen e Champions League ku do të përballet me Dortmundin, pasi eliminoi në një sfidë dramatike Bayernin e Mynihut. Spanjollët mbeten zotër të këtij kompeticioni, ndërsa synojnë të fitojnë të 15-in trofe në histori, në rast se arrijnë të kalojnë pengesën finale.

Në Bernabeun e tejmbushur e me një atmosferë spektakolare, Los Blancos zhvilluan një ndeshje tejet pozitive, duke fituar në shifrat 2-1, me një përmbysje që erdhi në fund.

Një pjesë e parë më e mirë për vendësit edhe pse raste pati për të dyja skuadrat.

Në fraksionin e dytë gjermanët gjetën golin me Davies, pas një gjuajtje të saktë me të djathtën. Në vijim, Reali barazoi falë një autogoli të mbrojtësit kanadez, por goli u anulua pasi më herët kapiteni Nacho kishte shkaktuar faull.

Kur u duk se fitorja do të ishte në kampin mik  Joselu riktheu ekuilibrat në minutën e 88, e përmbysi gjithçka në të parën e shtesës. Polemikat nuk do të mungonin në fundin e ndeshjes, aty ku De Ligt shënoi gol, por për kryesorin Marciniak, aksioni ishte në pozicion jashtë loje. Polaku nuk lejoi vijimin e aksionit për të ndërhyrë me VAR në bazë të rregullores, por menjëherë ndërpreu aksionin, duke e bërë të pavlefshëm golin.

Në fund fiton Reali që avancon në finale dhe ëndërron titullin e 15-të kampion.

LEXONI GJITHASHTU:

• Caktohen sot finalistët e Europa League, dy supersfida premtojnë spektakël
• Dortmund në finalen e Champions, verdhezinjtë rikthehen pas 11 vitesh