Dortmund në finalen e Champions, verdhezinjtë rikthehen pas 11 vitesh

Nuk shiheshin për asnjë moment favoritë, por futbolli ndaj është magjik, spektakolar dhe i paparashikueshëm, Dortmundi është finalisti i parë i Champions League. Verdhezinjtë eliminuan PSG-në duke e mposhtur në shifrat 2-0 në total, e kështu rikthehen në finalen e kompeticionit më madhor për klube pas plot 11 vitesh.

Strategu Edin Terzic ia doli të mposhtë sërish Luis Enriquen këtë herë në parkun e princave, ndërsa heroi ishte Mats Hummels, me mbrojtësin që shënoi golin e vetëm të sfidës. Parizienët më kërkues gjatë gjithë takimit, duke shpërdoruar pafund, por dhe të braktisur nga fati, duke goditur shtylla e traversa, e në fund i japin lamtumirëm kompeticionit.

Dortmund në anën tjetër, me fatin me vete, por jo vetëm, me 1 ekip kompakt me shpirt e dëshirë do të luftojë për fitimin e Champions League.

Misioni mbetet i vështirë pasi kundërshtari i radhës pritet të jetë një mes Bayernit dhe Realit, ndërsa Dortmundi e ka fituar kompeticionin në 1997-ën, ndërsa në 2013-ën u mposht në finale pikërisht nga bavarezët.