Reciprociteti me targat, Meta: Palët të ulin tensionet e t’u përmbahen marrëveshjeve të arritura

Presidenti Ilir Meta ka deklaruar se ruajtja e sovranitetit shtetëror dhe e integritetit territorial të Republikës së Kosovës është faktor kyç për konsolidimin e paqes, sigurisë dhe stabilitetit në rajon.

“Ruajtja e sovranitetit shtetëror dhe e integritetit territorial të Republikës së Kosovës është faktor kyç për konsolidimin e paqes, sigurisë, stabilitetit dhe fqinjësisë së mirë në rajon dhe baza e ndërtimit të marrëdhënieve të qëndrueshme me Serbinë”, shkruan Meta në një postim në Facebook, pas tensioneve të krijuara mes Kosovës dhe Serbisë për reciprocitetin për targat.

Sipas presidentit të dy vendet duhet të kapërcejnë tensionet e krijuara së fundmi.

Ai thekson më tej se Kosova dhe Serbia duhet t’u përmbahen detyrimeve, që rrjedhin nga marrëveshjet e arritura nga të dy vendet me ndërmjetësimin e BE dhe SHBA.

Javën e fundit janë shtuar tensionet mes Kosovës dhe Serbisë, pas vendimit të Albin Kurtit për reciprocitetin me targat.

Në mbledhjen e Këshillit të Sigurisë të zhvilluar dje në Beograd, presidenti Vuçiç tha se u diskutua situata pas “aksionit kriminal të Prishtinës”, ndërsa siguroi se do të ruajnë paqen dhe stabilitetin për serbët në Kosovë.

Presidenti serb shtoi se ka refuzuar propozimin për të bërë një zgjidhje kompromisi.

Ndërkohë pak orë më vonë i dërguari i BE-së për dialogun Kosovë-Serbi përmes një postimi në Twitter deklaroi se ishte i shqetësuar nga situata e tensionuar dhe bëri thirrje që dy vendet të ruanin qetësinë.

LEXONI GJITHASHTU:

• Osmani takon sekretarin e NATO-s: Kosova ka zbatuar marrëveshjet e Brukselit për lirinë e lëvizjes
• Reciprociteti për targat, qytetarët e Luginës së Preshevës mbështesin vendimin e Kurtit
• Reciprociteti i targave Kosovë-Serbi, reagon kryeministri Rama