Reciprociteti i targave Kosovë-Serbi, Agon Maliqi: Mund të kthehet si bumerang për Kurtin

Analisti Agon Maliqi tha në emisionin Now në Euronews Albania se qeveria Kurti duhet mbështetur për nismën e fundit të reciprocitetit të targave me Serbinë. Kjo sipas tij është një qasje proaktive jo vetëm me Serbinë, por edhe me aleatët.

“Veriu mbetet në një gjendje të mjegullt ligjore dhe ky është një hap përpara, por mbart me vete edhe disa risqe”, tha ai.

Nëse kjo situatë nuk menaxhohet drejt, sipas analistit mund të kthehet si bumerang për Kurtin në vijim.

“Është mirë që kemi nxitur reagime, është një përshkallëzim i situatës, si ai me taksën 100 për qind. Por nëse nuk menaxhohet drejt, mund të kthehet edhe në bumerang dhe kjo është pjesa e riskut që ka marrë përsipër”, tha analisti.