Reja: Bëmë paraqitje të mirë ndaj Italisë, por shpërdoruam raste

Shqipëria është mposhtur nga Italia me rezultatin 1-3 në ndeshjen miqësore të zhvilluar në stadiumin “Air Albania”.

Kuqezinjtë luajtën mirë, teksa diferencën në fushë e bënë kualitetet e kundërshtarit, pa lënë pas dhe rastet e shpërdoruara. Shqipëria kaloi e para në avantazh me Bajramin, por më pas axurrët shënuan 3 gola, me Grifon protagonist.

Trajneri Edoardo Reja pas ndeshjes pohoi se skuadra luajti mirë, por disa gjëra nuk shkuan siç duhet.

“Paraqitjen e bëmë goxha të mirë, nëse Italia do kishte rastet tona do shënonin 4-5 gola. Kur vjen puna para portës, janë shumë të saktë. Ndeshjen ndaj Armenisë dua të luajmë si në pjesën e dytë ndaj Italisë. Skuadra nuk luajti siç e kishim përgatitur. Bëra disa ndryshime me Uzunin, Brojën apo Bajramin, por sot ishte shumë e vështirë. Kur ishim 1-2, patëm një rast u prek traversa dhe mund të shkonte në 2-2. Mund të kishim marrë një rezultat pozitiv”, tha ai.

Lojtarët e Shqipërisë treguan emocionet e kësaj përballje të madhe, pa harruar dhe mbështetjen e tifozërisë.

Shqipëria do të zhvillojë një tjetër miqësore në datën 19 përballë Armenisë në Tiranë.

LEXONI GJITHASHTU

• Botërori në Katar, Grupi C: Argjentina dhe Messi luftojnë për titull
• Ronaldo: Unë respektoj vetëm tre lojtarë të Manchester United

• Shqipëria mposhtet nga Italia në miqësoren në “Air Albania”