Reshjet e dëborës, 30 shkolla në juglindje pa mësim

Reshjet e dendura të dëborës dhe kushtet atmosferike ekstreme kanë pezulluar procesin mësimor në 30 shkolla në juglindje të vendit.

Kjo ka prekur rreth 1100 nxënës, shumica e të cilëve në zonën e Pogradecit.

Shkollat e qendrave kryesore si Velçani (138 nxënës), Rodokali (145 nxënës), Proptishti (112 nxënës) dhe Trebinja (84 nxënës), si dhe disa shkolla të tjera në fshatra si Bishnica, Slabinje, Laktesh, Buzaishtë, Kriçkovë dhe Grunjas, janë mbyllur për shkak të dëborës së madhe që ka bllokuar rrugët dhe ka bërë të pamundur transportin e nxënësve.

Po ashtu, shkolla të tjera në Devoll dhe Korçë-Pustec, si ato në Vidëhovë, Arrzë, Vithkuq, Lubonjë dhe Panarit, kanë pezulluar mësimin për shkak të kushteve të pafavorshme atmosferike dhe vështirësive në aksesin për në shkolla.

Ndërhyrja për përmirësimin e situatës pritet të bëhet në ditët në vijim, në përpjekje për të mundësuar vazhdimin e procesit mësimor në këto zona të prekura.

LEXONI GJITHASHTU:

• Moti i keq, pezullohet përkohësisht mësimi në 77 shkolla
• Makina bllokohet nga moti i keq në malin e Tomorit, Policia ndihmon familjen