Qeveria e kryeministrit Mitsotakis i mbijetoi këtë premte, një mocioni mosbesimi nga lideri i opozitës së vendit mbi një skandal përgjimi që ka goditur partinë qeverisëse të qendrës së djathtë në prag të zgjedhjeve.
Nga 300 anëtarët e parlamentit, 143 votuan pro mocionit të mosbesimit ndërsa 156 votuan kundër, një ligjvënës mungonte. Votimi pasoi një debat të ashpër parlamentar tre-ditor.
Mocioni pritej të dështonte, pasi partia qeverisëse Demokracia e Re ka një shumicë komode prej 156 vendesh në parlamentin grek.
Kreu i partisë kryesore të opozitës Syriza, Alexis Tsipras tha të mërkurën kur paraqiti mocionin se do të detyronte kryeministrin Kyriakos Mitsotakis të përgjigjej publikisht për skandalin.
Duke folur gjatë debatit të ashpër të së premtes, Tsipras akuzoi Mitsotakis se kishte urdhëruar personalisht përgjimet.
“Ju e dinit shumë mirë që kishte ndodhur survejimi sepse e kishit urdhëruar ju zoti Mitsotakis”, tha Tsipras.
Skandali i përgjimeve shpërtheu seriozisht në gusht, kur një ndihmës i lartë i qeverisë dhe kreu i agjencisë së inteligjencës të vendit dhanë dorëheqjen pas zbulimeve se një politikan socialist – i cili më vonë u zgjodh si kreu i partisë së tretë më të madhe të Greqisë – kishte qenë nën vëzhgim telefonik.
Mitsotakis këmbënguli në atë kohë se përgjimi ishte i ligjshëm, por i pahijshëm.
“Po ta dija nuk do ta kisha miratuar atë”, tha Mitsotakis.
Qeveria gjithashtu prezantoi më vonë legjislacionin që shtrëngonte rregulloret mbi aplikimin e përgjimeve në vend.
“Qeveria dhe unë jemi shprehur qartë që nga fillimi,” tha Mitsotakis në përgjigje të fjalimit të Tsipras, duke vënë në dukje se ai kishte marrë përgjegjësinë politike dhe kishte zëvendësuar përsonat përgjegjës për përgjimet.
LEXO GJITHASHTU: