Rifillon dialogu mes Iranit dhe vendeve evropiane për marrëveshjen bërthamore

Përfaqësues të Iranit dhe vendeve evropiane janë mbledhur sërish në Stamboll për një raund të ri bisedimesh mbi të ardhmen e marrëveshjes bërthamore të vitit 2015. Takimi zhvillohet në Konsullatën e Përgjithshme të Iranit në qytetin turk dhe përbën raundin e dytë të këtij formati diplomatik.

Delegacioni iranian përfaqësohet nga zëvendësministrat e Jashtëm, Majid Takht-Ravanchi dhe Kazım Gharibabadi, ndërsa pala evropiane përfshihet nga grupi E3: Britania e Madhe, Franca dhe Gjermania, tw gjitha nënshkruese të marrëveshjes së njohur si Plani i Përbashkët Gjithëpërfshirës i Veprimit.

Bisedimet janë thirrur me kërkesë të vendeve evropiane, në një përpjekje për të ringjallur zbatimin e marrëveshjes që synon kufizimin e kapaciteteve bërthamore të Iranit në këmbim të lehtësimit të sanksioneve ndërkombëtare.

Pavarësisht se marrëveshja ekziston ligjërisht, funksionimi i saj është dobësuar ndjeshëm që nga tërheqja e njëanshme e Shteteve të Bashkuara në vitin 2018, gjatë presidencës së Donald Trump, çka çoi në përshkallëzimin e tensioneve dhe rikthimin e disa aktiviteteve bërthamore nga ana e Teheranit.

Takimi i parë në këtë format u zhvillua më 16 maj, po ashtu në Stamboll, ndërsa raundi i ri i bisedimeve vjen në një moment kritik, kur shqetësimet ndërkombëtare për programin bërthamor iranian po rriten dhe përpjekjet diplomatike për ruajtjen e marrëveshjes janë intensifikuar.

LEXONI GJITHASHTU:

• Pentagoni “tkurr” dëmet: Programi bërthamor iranian, 2 vjet pas nga sulmet
• Mbi 500 mijë afganë të dëbuar nga Irani pas përfundimit të konfliktit me Izraelin