Rikthehet partneriteti, SHBA-BE bashkojnë forcat kundër COVID, Rusisë dhe Kinës

Bashkimi Evropian dhe Shtetet e Bashkuara duket se e kanë kaluar periudhën e marrëdhënieve të ftohura që dominoi gjatë administratës së Donald Trump.

Në takimin e parë të zhvilluar të mërkurën në Bruksel, sekretari amerikan i Shtetit, Antony Blinken dhe presidentja e Komisionit Evropian, Ursula von der Leyen rikonfirmuan bashkëpunimin për një sërë çështjesh, si pandemia e coronavirusit, ndryshimet e klimës, Ballkani Perëndimor, si dhe kërcënimet që vijnë nga Rusia dhe Kina.

“Prioriteti ynë kryesor është frenimi i pandemisë së coronavirusit dhe përballja me pasojat e saj në ekonomi dhe tek njerëzit. Ne e dimë që asnjë pjesë e botës nuk do të jetë e sigurt derisa të gjithë ne të jemi të sigurt. Ndaj, mezi pres të bashkëpunoj me ty, Toni, për forcimin e zinxhirit global të furnizimit me vaksina”, u shpreh Ursula von der Leyen, presidente e Komisionit Evropian.

“Shtetet e Bashkuara do të punojnë ngushtë me aleatët e tyre dhe sidomos me partnerët e Bashkimit Evropian për të adresuar sfidat e përbashkëta dhe për të arritur objektivin për një Evropë të lirë dhe në paqe. Më duhet të them, zonja presidente, se ne e shohim Bashkimin Evropian një partner të rëndësisë së parë për gjithçka që ju keni në agjendë dhe një seri çështjesh të tjera për të cilat ne do të diskutojmë”, tha Antony Blinken, sekretar i Shtetit, SHBA.

Shefi i diplomacisë amerikane shtoi se Amerika dhe Evropa së bashku mund t’i tregojnë botës se vlerat e lirisë dhe demokracisë mund të mbizotërojnë.